Acta Pacis Westphalicae III D 1 : Stadtmünsterische Akten und Vermischtes / Helmut Lahrkamp
50. Chigis Verhalten zu den Protestanten
50
DH, Adami II fol. 167.
Nuncius Apostolicus non admisit ad se acatholicorum procerum, princi-
pum aut rerumpublicarum legatos, imo neque catholici regis acatholicum
Matthiam de Cracau . Rogatus causam, dixit, primo se vitare haereticos,
nisi quoad conversionis desideria monstrarent; secundo, quod denegando
istis hominibus accessum praescindat occasiones aliqua referendi tanquam
a se prolata, quae revera non protulerit, quod haereticorum sit ingenium;
tertio, quod velut mediator publicam ageret personam, cuius officium se
duntaxat ad catholicos extenderet.
Dum etiam nonnemo ex foederati Belgii legatis per interpositam personam
obiiceret, se non solum ad audientiam admissum a cardinalibus de Valetta,
Richelio, Mazarino, sed ad mensam quoque; quemadmodum et nuncii Pa-
risienses et qui in locis aliquando comitiorum imperialium sunt Apostolici
nuncii Hugonottas ac Lutheranos admitterent, ait: Si quidem ego vel in
Gallia, vel apud publica imperii comitia essem, admitterem haereticos nec
fortasse male facerem; si econtra meo loco essent nunc Munsterii Valetta,
Richelius, Mazarinus, alii nuncii, credo ipsos non admissuros haereticos,
aut, si id facerent, male me iudice facerent. Utrum vero, si quis acatholico-
rum procerum legatum misisset catholicum, hic admissus a nuncio fuisset,
ignoro, nec tamen dubito, quandoquidem et legatorum catholicos missio-
narios excepit libens.