Acta Pacis Westphalicae II C 2 : Die Schwedischen Korrespondenzen, Band 1: 1645-1646 / Wilhelm Kohl
183. Die französischen an die schwedischen Gesandten Münster 1646 September 12 n. St
–/ 183 /–
Münster 1646 September 12 n. St.
Kopie: DG, A I 1, Legat . [ 5 ], 331–331’ als Beil. B zu Nr. 185
Beteuerung der Bündnistreue.
Nous avons veu avec joie, que Voz Excellences ont desiré avoir esclair-
cissement de ce qui se traicte presentement entre les Imperiaux et nous.
C’est la vraye maniere pour maintenir la bonne correspondance, qui doit
estre entre des alliez, que de s’ouvrir librement les uns aux autres. Nous
sommes aussy bien aises de voir que Voz Excellences soient tres persuadées
de nostre fidelité en l’observation de l’alliance, comme nous avons esté cy
devant de la leur en pareille occasion. Ce que nous traictons, Messieurs, est
le point de la satisfaction particuliere de la France. La premiere chose, que
nous avons mis en avant, a esté, que cela se feroit avec relation au Traicté
general et à la charge, que la Couronne de Suede sera satisfaicte, autrement
que tout ce qui seroit dict et faict entre les commissaires de l’Empereur et
nous, seroit de null effect et valeur. Ce qui a esté repeté sy souvent et sy
expressement comme une condition absolue et qui sera mise par escrit en
cas que l’on conclue quellque chose, que nous pouvons assurer Voz Exce-
lences , que les Ennemis mesmes ne se flattent pas d’une sy folle esperance
que de penser, qu’ilz puissent porter la France à se separer de ses alliez.
Au surplus, les choses ne sont point encor resolues, quoyque, pour y donner
facilité, nous ayons augmenté les offres, que nous avions faictes cy devant.
Mais de tout ce qui s’est negotié, nous en avons donné une communication
exacte et jour par jour à Monsieur de Rosenhan, qui n’aura pas manqué,
d’en tenir adverties Voz Excellences. Il eut esté à desirer, qu’il eut esté
present aux conferences, comme nous avions commandé de l’y appeller, et
estimions, qu’il se devoit practiquer de part et d’autre. A ce defaut, nous
avons esté fort ponctuelz à luy communiquer ce qui s’y est passé, et nous
continuerons de mesme jusqu’à la fin, ne doutant pas, que Voz Excellences
n’en usent de la sorte envers le Resident du Roy nostre maistre, qui sera
dans peu de jours aupres d’Elles. Quand les choses seront arrestées, nous
pouvons aller en informer encores plus amplement Voz Excellences, qui
sçavent, qu’Elles ont laissé souvent passer deux mois et plus entre les visites
ordinaires. Ce qui les doit mettre dans un repos tout entier, est, que pendant
qu’on agit icy avec tant de precautions et de seuretés pour l’interest de la
Couronne de Suede, il se treuve, qu’en mesme temps l’armée du Roy est
joincte avec la Vostre et coopere puissamment pour la cause commune.