Acta Pacis Westphalicae III D 1 : Stadtmünsterische Akten und Vermischtes / Helmut Lahrkamp
32. Der armenische Patriarch von Konstantinopel 1647 [März]
32
1647 [März]
DH, Adami II fol. 180’.
Osnabrugam et Monasterium veniebat quidam Thomas Antiochenus, qui
se dicebat patriarcham Armenorum Constantinopoli, Romam iturus.
Huic largis eleemosynis legati quidam subveniebant ampliores, aliqui
ipsum salvo conductu et veluti patriarchatus sui testimonialibus literis
honorabant. Nuncius Apostolicus iis visis eundem dato honorario et com-
mendatitiis ad sedem Apostolicam dimittebat. Cum vero adverteret eum
non recta, sed per ambages procedere adessentque praeterea causae de
viri istius integritate suspicandi, scripsit mox ad internuncium Bruxellensem
nepotem suum, ut literas bona fide communicatas repeteret ab homine,
quem audierat Bruxellis subsistere. Et quia serius adventabant huiusmodi
literae Bruxellas, postquam videlicet patriarcha ille in Gallias iam abiisset,
nuncius Parisiensis monitus abstulit ab eo literas et ad nuncium Monaste-
riensem remisit.