Lesdictz Sieurs Médiateurs, pour n’oublier aulcune des plaintes et des raisons de nos parties, en avoient faict un extraict qu’ilz nous ont voulu lire, dontnous avons esté d’aultant plus surpris qu’il y avoit en beaucoup d’endroitz des termes peu concertez et que l’on peust appeler insolens, comme s’il leur estoit permis de mettre par escript que nous avons manqué à nostre parolle et que nous n’avons pas faict les actions que l’on pouvoit attendre de per- sonnes d’honneur. Nous n’eussions pas treuvé cela sy estrange si ces parolles désobligentes fussent venues immédiatement de noz parties. Mais nous avons eu un peu de subject de nous scandaliser de ce que Messieurs les Médiateurs se sont vouluz charger de nous les faire entendre. Néantmoins, nous nous sommes contentéz de leur dire fort civilement que nous voulions estre plus modestes et plus respectueux en leur endroict que n’avoient esté nos parties, et que nous n’avions garde de les rendre porteurs de la responce que méritoient de semblables parolles, laquelle nous sçaurions bien faire sçavoir ailleurs et la publier quand il seroit temps et qu’on nous y obligeroit. Qu’on n’avoit pas accoustumé de traicter des affaires de telle importance par des invectives, mais qu’il y avoit longtemps qu’on s’estoit apperceu que le pouvoir de ceux qui estoient icy de la part de l’Empereur et du Roy Catholique s’estendoit plustost à faire des déclamations et des libelles qu’à conclure un bon traicté de paix.

Enfin, Monsieur, toutte la conférence a abouty à soustenir de nostre costé que nostre proposition est plus raisonnable et plus effective que celle des ennemys, et eux à nous vouloir persuader le contraire et que ce que nous avions demandé estoit encor une espèce de préliminaire. Ilz n’ont rien oublié pour nous disposer à adjouster une aultre proposition qui peust en quelque sorte appaiser noz parties. Ilz y ont mesme un peu meslé parfois de leur intérest particulier en nous représentant que cela les garentiroit, eux Média- teurs, des attacques qu’on leur donnoit qu’ilz avoient contribué à faire recevoir ce préjudice et cet affront aux Impériaux et Espagnolz. Qu’ilz estoient obligéz de nous advertir avec franchise qu’il seroit malaisé désormais qu’ilz peussent conserver l’oppinion qu’ilz avoient eue jusques icy et qu’ilz avoient tasché de donner au monde que nous voulions sincèrement la paix, puisqu’au lieu d’en advancer la négotiation, nos propositions ne tendoient qu’à y apporter des obstacles sans fin et sans remède.

Nous n’avons pas manqué de leur faire comprendre par le discours de tout ce qui s’est passé depuis nostre arrivée en ce lieu, que touttes les difficultéz et retardementz estoient venuz de nos parties et non pas de nous, puis- qu’aprèz nous avoir tenuz cinq mois sans entrer en aulcune conférence pour le respect du Roy de Dannemark, ilz avoient faict et faisoient encor tout leur possible pour empescher que les desputtéz des Princes et Estatz de l’Empire se rendissent icy, quoyqu’ilz sceussent bien que l’Empereur n’avoit pas l’authorité tout seul de décider des intérestz de l’Empire. Que lesdictz Princes et Estatz y eussent le mesme droict que luy et que nous eussions déclaré de ne pouvoir traicter sans cela, veu mesme que les deux derniers traittéz desquelz nos parties se veullent servir contre nous qui sont celuy de Ratisbonne et celuy de Prague, le premier a esté faict dans une diètte,et dans l’aultre il est expressément porté au pénultiesme article qu’il n’appar- tient pas à l’Empereur de faire aulcun traicté de paix que dans une assemblée des Princes et Estatz de l’Empire. Que nous ne demandions en cela rien de nouveau qui ne fust conforme aux coustumes et constitutions de l’Empire et que par conséquent, ayant faict de nostre part par plusieurs lettres et offices touttes les diligences possibles, nous laissions au jugement du monde de prononcer qui estoit coulpable du retardement de la paix, ou ceux qui n’avoient rien oublié pour convocquer les personnes qui ont droict d’y assister et de la conclure, ou ceux qui ont employé les artifices et les menaces pour les empescher de venir.

Là dessus lesdictz Sieurs Médiateurs nous ont demandé, comme ilz avoient desjà faict cy devant, si nous prétendions de contraindre les Princes et Estatz de l’Empire de venir ou envoyer icy en cas qu’ilz ne le voulussent pas. Que c’estoit entreprendre une chose impossible que de les vouloir tous faire venir, et qu’en tout cas, la raison vouloit que nous prissions quelque temps limité pour traicter d’affaires, si lesdictz Princes et Estatz percistoient à ne venir ou à n’envoyer pas icy aprèz les diverses semonces que nous leur en avons faictes.

Nous avons respondu à la première demande que nous ne prétendions de contraindre personne n’en ayans pas le pouvoir, ny mesmes de faire aulcun préjudice à la dignité de l’Empereur en demandant qu’il soit assisté de ceux sans le suffrage desquelz il n’a pas droict de résouldre les affaires de la paix et de la guerre. Mais que nous avions grand subject de nous plaindre que l’Empereur au lieu de faciliter la venue de ceux qui doibvent assister à cette assemblée pour la rendre légitime de son costé, n’oubliast rien pour les empescher d’y venir. Que tant s’en fault qu’il fust besoing d’user de con- traincte pour les y faire venir, la pluspart nous avoient tesmoigné par leurs responces qu’ilz avoient très grande impatience de s’y rendre et qu’ilz se mettroient en chemin au premier jour.

Quand au nombre des desputéz, nous avons déclaré que quand il y en auroit icy un nombre suffisant pour concerter avec eux les moyens de restablir l’ancien ordre de l’Empire, nous croyons bien qu’on pourroit entrer en matière sans estre obligéz d’attendre tous les aultres, mais qu’on ne pouvoit pas les accuser ny les uns ny les aultres d’estre encor en demeure, puis- qu’ayans tousjours sceu qu’il ne se faisoit rien à Munster ny à Oznabrug, ilz n’avoient point esté obligéz de se mettre en voyage que jusques à ce qu’ilz ont eu cognoissance de nos dernières conventions. Que pour cet effect, nous leur en avons donné advis et attendions leurs responces. Mais que sy les Impériaux vouloient agir de bonne foy comme nous, il fauldroit qu’ilz fissent les mesmes offices de leur costé, ou du moins qu’ilz donnassent une déclaration de la part de leur maistre qu’ilz n’empeschent point que les- dictz Princes et Estatz ne puissent venir.

Que pour le délay dont ilz nous parloient, nous jugions bien que le terme pour les attendre ne debvoit pas estre infiny, mais qu’aussy il n’estoit pasjuste de nous presser avant que nous eussions receu la responce aux dernières lettres que nous avions escrittes qui estoient les seulles qui avoient peu effectivement les convier de venir, puisque touttes les aultres les avoient bien invitéz de nostre part, mais en un temps où ilz aprenoient d’ailleurs qu’on ne traictoit point et où l’Empereur employoit son authorité pour les intimider et pour leur imputter à crime seulement d’avoir receu noz lettres.

Nous avons esté obligéz de faire remarquer en cet endroict auxdictz Sieurs Médiateurs que comme nos intentions sont droictes et sincères et portées à faire une paix légitime et universelle, nous ne pouvions rien faire que de l’adveu de noz confédéréz et aprèz en avoir meurement délibéré avec eux, au lieu que noz parties qui ne visent qu’à nous divertir et à faire des traictéz particuliers nous pressent tantost icy, tantost à Oznabrug pour nous engager à faire icy ou là quelque demande qui nous désunisse. Mais que comme touttes leurs pensées ne tendent qu’à nous faire donner dans cet escueil, touttes les nostres ne sont qu’à nous en garentir, avec cette différence pour- tant que la leur est malicieuse aultant que la nostre est juste et raisonnable.

La résolution finalle de cette conférence a esté que nous donnerions advis aux Ambassadeurs de Suède de tout ce que lesdictz Sieurs Médiateurs nous avoient remontré, et qu’aprèz avoir sceu leur advis dans cinq ou six jours, nous leur ferions responce. Il s’est rencontré heureusement que pour en abréger le temps et nous en faciliter les moyens, Monsieur le Baron Oxen- stiern se rendist icy le lendemain, faisant semblant que la curiosité de veoir les cérémonies de la feste l’y avoit faict venir, quoyque la suitte nous ayt faict cognoistre assez clairement qu’il avoit en effect intention de traicter avec nous sur tout ce qui se passoit icy et à Oznabrug et ne laisser pas plus longtemps à son collègue l’advantage de résouldre seul avec nous les affaires publicques.

Nous avons eu diverses conférences avec luy

Vgl. dazu Oxenstierna und Salvius an Königin Christine, Osnabrück 1645 Januar 3113, Druck: APW II C 1 nr. 265 S. 446–451.