Ich halte die Errichtung einer Gesandtschaft in Schweden für wichtig und möchte gerne La Cour dazu verhelfen.

Je vous suplie par rencontre d’asseurer Monsieur Le Roy que je n’ay point du tout contribué à résolution qui a esté prise sur l’employ de secrétaire de cette ambassade. On a voulu persuader au Sieur de Préfontaines que cela est venu de moy, cependant vous sçavez ce qui en est et qu’au contraire l’on n’a proposé ce changement que pour me désobliger. C’est pourquoy vous me ferez plaisir de tesmoigner audict Sieur Le Roy en cas que Monsieur Brasset ne vienne point, que comme j’ay donné les mains de bon cœur dès le commencement à son frère, je le luy donne encor pour travailler soubz nous comme il a faict jusques icy. Car sy on y vouloit apporter quelque nouveauté comme de le charger de faire les dépesches, ce qui seroit hors de raison, je craindrois que nous n’eussions plus de peine de les corriger que nous n’en aurions de les faire. Sy aussy Monsieur de Brienne juge que la chose se doibve faire autrement et selon qu’il me l’avoit proposé par une de ses lettres, que nous nous chargions des despesches Monsieur d’Avaux et moy par sepmaine ou par mois, je suivray en mon particulier tous les expédiens qu’il vouldra, et ainsy nous ferions travailler chacun nos secré- taires. Je ne croy pas que ledict Sieur Brasset vienne, car il m’a encor escript une lettre qui me faict cognoistre de grandes difficultéz, sy bien que sy on le forçoit de venir, je craindrois qu’il ne nous fist bien de la peine estant icy contre son gré et voulant se faire achepter.

Je vouldrois bien que Monsieur d’Avaux eust eu un peu plus de charité pour moy qu’il n’a eu. J’avois commencé de travailler à la despesche d’aujourd’huy, mais ayant esté attacqué d’une violente colicque qui m’a duré six heures, je l’avois envoyé prier pendant la violence de mon mal devouloir commander le reste de la despesche à quelqu’un de ses secrétaires. Mais il m’a renvoyé dire qu’il ne s’estoit pas applicqué à cela et qu’il avoit perdu le fil des affaires. Ce que voyant, j’ay voulu continuer de travailler durant un peu d’intervalle que mon mal m’a donné, mais ce que j’ay faict m’a donné la fièbvre, sy bien que je ne sçay encor ce que cela deviendra. Je vous asseure que les grandz employz donnent de grandz honneurs, mais ilz causent beaucoup d’incommoditéz, vous pouvant asseurer que je suis vieilly de plus de dix ans depuis que nous sommes en ce lieu.